Las ! force m'est qu'en bruslant je me taise, 
Car d'autant plus qu'esteindre je me veux, 
Plus le desir me r'allume les feux 
Qui languissoient [sous]1 la morte braise. 

Si suis-je heureux (et cela me r'appaise) 
De plus souffrir que souffrir je ne peux, 
Et d'endurer le mal dont je me deulx ; 
Je me deulx, non, mais dont je suis bien aise. 

Par ce doux mal j'adoroy la beauté 
Qui, me liant d'une humble cruauté, 
Me desnoua les liens d'ignorance. 

Par luy me vint ce vertueux penser
Qui jusqu'au ciel fit mon cœur elancer,
Ailé de foy, d'amour et d'esperance.