Avec les tiens, Seigneur, tu as faict paix,
Et de Jacob les prisonniers laschés.
Tu as quitté à ta gent ses meffaicts.
Voire tu as couvert tous ses pechés :
Tu as loing d’eux ton despit retiré,
Et ton courroux violent moderé.

O Dieu, en qui gist le salut de nous,
Restabli nous, appaisant ton courroux :
Est-ce à toujours que ton ire estendras,
Et ta fureur de fils en fils ira ?
Ainçois plustost la vie nous rendras,
De quoy ton peuple en toy s’esjouïra.
O Eternel, quoy que nous ayons faict,
Demonstre nous ta grace par effect : 
Et nonobstant tous nos faicts vicieux,
Octroye nous ton salut glorieux.

Mais quoy ? je veuil escouter que dira
Le Seigneur Dieu, car à ceux là qui sont
Doux et benins, de paix il parlera,
Et eux aussi plus sages deviendront.
Certes à ceux qui en crainte ont recours
A sa bonté, prochain est son secours :
A celle fin, qu’en lieu de tout meschef
Sa gloire habite entre nous derechef. 
Misericorde et foy alors se joindront,
Justice et paix s’accoller on verra :

Foy sortira de terre contremont,
Justice en bas du ciel regardera :
Dieu mesmement nous donnera ses fruicts,
Qui nous seront par la terre produits :
Bref devant luy juste gouvernement
Ira son train sans nul empeschement.