by Kraft von Toggenburg, Graf (1228 - 1254)

Mir ist leide
Language: Mittelhochdeutsch 
Mir ist leide·
das der winter beide·
walt vnd ouch die heide·
hat gemachet val·
sin betwingen·
lat niht blůmen entspringen·
noch die vogel singen·
ir vil suͤssen schal·
alsus verderbet mich ein selig wib·
dú mich lat·
ane rat·
den si hat·
des zergat·
an froͤiden gar min lip·

Miner swere·
schiere ich ane were·
solde ich die seldebere·
schowen ane leit·
dú vil here·
hat schoͤne zuht vnd ere·
der wnsch vnd dannoch mere·
ist gar an si geleit·
rose wengel mv́ndel rot si hat·
val har lang·
kele blank·
siten kranc·
min gedanc·
an ir vil hohe stat·

Jch wil singen·
mere vf gv̊t gedingen·
sol mir wol gelingen·
das mv̊s an ir geschehen·
si kan machen·
trurig herze lachen·
grosse sorge swachen·
des mv̊s man ir iehen·
wurde mir ir werder trost geseit·
seht fúr war·
offen bar·
minú iar·
wolde ich gar·
mit froͤiden sin gemeit·

Confirmed with the Codex Manesse 23v, 13. Jahrhundert, digitalized by the University of Heidelberg.


Authorship:

Musical settings (art songs, Lieder, mélodies, (etc.), choral pieces, and other vocal works set to this text), listed by composer (not necessarily exhaustive):

    [ None yet in the database ]

Settings in other languages, adaptations, or excerpts:


Researcher for this text: Emily Ezust [Administrator]

This text was added to the website: 2020-10-29
Line count: 42
Word count: 151