Adieu m'amour, adieu ma joye,
Adieu le solas que j'avoye,
Adieu ma leale mastresse!
Le dire adieu tant fort me blesse,
Qu'il me semble que morir doye.

De desplaisir forment lermoye.
Il n'est reconfort que je voye,
Quant vous esloigne, ma princesse.
  Adieu m'amour, [adieu ma joye,
  Adieu le solas que j'avoye,
  Adieu ma leale mastresse!]

Je prie a Dieu qu'il me convoye,
Et doint que briefment vous revoye,
Mon bien, m'amour et ma deesse!
Car advis m'est, de ce que laisse,
Qu'apres ma paine joye aroye.

  Adieu m'amour, [adieu ma joye,
  Adieu le solas que j'avoye,
  Adieu ma leale mastresse!
  Le dire adieu tant fort me blesse,
  Qu'il me semble que morir doye.]