Awa whigs awa,
Awa whigs awa,
Ye're but a pack o' traitor louns,
Ye'll do nae gude at a'.

Our thrissles flourish'd fresh and fair,
  And bonie bloom'd our roses;
But whigs cam like a frost in June,
  And wither'd a' our posies.
    Awa whigs awa...

Our ancient crown 's fa'n in the dust;
  Deil blin' them wi' the stoure o't,
And write their names in his black beuk
  Wha gae the whigs the power o't!
    Awa whigs awa...

Our sad decay in church and state
  Surpasses my descriving:
The whigs cam o'er us for a curse,
  And we hae done wi' thriving.
    Awa whigs awa...

Grim Vengeance lang has taen a nap,
  But we may see him wauken:
Gude help the day when royal heads
  Are hunted like a maukin.
    Awa whigs awa...