Ca' the yowes to the knowes,
  Ca' them whare the heather grows,
Ca' them whare the burnie rowes,
  My bonie Dearie.

Hark, the mavis' evening sang
Sounding Clouden's woods amang;
Then a faulding let us gang,
  My bonie Dearie.
Ca' the yowes to the knowes...

We'll gae down by Clouden side,
Through the hazels spreading wide
O'er the waves, that sweetly glide
  To the moon sae clearly.
Ca' the yowes to the knowes...

Yonder Clouden's silent towers,
Where at moonshine midnight hours
O'er the dewy bending flowers
  Fairies dance sae cheary.
Ca' the yowes to the knowes...

Ghaist nor bogle shalt thou fear;
Thou'rt to Love and Heaven sae dear,
Nocht of Ill may come thee near,
  My bonie Dearie.
Ca' the yowes to the knowes...

Fair and lovely as thou art,
Thou hast stown my very heart;
I can die - but canna part,
  My bonie Dearie.
Ca' the yowes to the knowes...