'Twas on a monday morning,
  Right early in the year,
That Charlie cam to our town,
  The young Chevalier.

         Chorus:
An' Charlie he 's my darling, my darling, my darling,
Charlie he 's my darling, the young Chevalier. -


As he was walking up the street,
  The city for to view,
O there he spied a bonie lass
  The window looking thro'. -
An' Charlie he 's my darling...

Sae light 's he jimped up the stair,
  And tirled at the pin;
And wha sae ready as hersel
  To let the laddie in. -
An' Charlie he 's my darling...

He set his Jenny on his knee,
  All in his Highland dress;
For brawlie weel he ken'd the way
  To please a bonie lass. -
An' Charlie he 's my darling...

Its up yon hethery mountain,
  And down yon scroggy glen,
We daur na gang a milking,
  For Charlie and his men. -
An' Charlie he 's my darling...