Come boat me o'er, come row me o'er,
  Come boat me o'er to Charlie;
I'll gie John Ross anither bawbee
  To boat me o'er to Charlie. -

        Chorus:

We'll o'er the water, we'll o'er the sea,
  We'll o'er the water to Charlie;
Come weal, come woe, we'll gather and go,
  And live or die wi' Charlie. -

I lo'e weel my Charlie's name,
  Tho' some there be abhor him:
But O, to see auld Nick gaun hame,
  And Charlie's faes before him!
We'll o'er the water, we'll o'er the sea...

I swear and vow by moon and stars,
  And sun that shines so early!
If I had twenty thousand lives,
  I'd die as aft for Charlie. -
We'll o'er the water, we'll o'er the sea...