There 's a youth in this city, it were a great pity
  That he from our lasses should wander awa;
For he 's a bony and braw, weel-favour'd with a',
  And his hair has a natural buckle and a'. -
His coat is the hue of his bonnet sae blue;
  His facket is white as the new-driven snaw;
His hose they are blae, and his shoon like the slae;
  And his clear siller buckles they dazzle us a'. -

For beauty and fortune the laddie 's been courtin;
  Weel-featur'd, weel-tocher'd, weel-mounted and braw;
But chiefly the siller, that gars him gang till her;
  The Pennie 's the jewel that beautifies a'. -
There 's Meg wi' the mailin that fain wad a haen him;
  And Susie whase daddy was laird o' the Ha':
There 's lang-tocher'd Nancy maist fetters his fancy -
  But th' laddie's dear sel he lo'es dearest of a'. -