O Tibbie I hae seen the day
Ye wadna been sae shy
For laik o' gear ye lightly me
But trowth I care na by -

Yestreen I met you on the Moor
Ye spak'na but gaed by like stoor
Ye geck at me because I'm poor
But fien' a hair care I. -

When comin' hame on Sunday last
Upon the road as I cam' past
Ye snufft an' gae your head a cast
But trouth I caretna by. -

I doubt na lass, but ye may think
Because ye hae the name o' clink
That ye can please me at a wink
Whene'er ye like to try -

But sorrow tak' him that 's sae mean
Altho' his pouch o' coin were clean
Wha follows ony saucy Quean
That looks sae proud and high -

Altho' a lad were e'er sae smart
If that he want the yellow dirt
Ye'll cast your head anither airt
An' answer him fu' dry -

But if he hae the name o' gear
Ye'll fasten to him like a breer
Tho' hardly he for sense or lear
Be better than the ky -

But Tibbie lass tak' my advice
Your daddie's gear mak's you sae nice
The de'il a ane wad speir your price
Were ye as poor as I -

There lives a lass beside yon park
I'd rather hae her in her sark
Than you wi' a' your thousand mark
That gars you look sae high -

An' Tibbie I hae seen the day
Ye wadna been sae shy
An' for laik o' gear ye lightly me
But fien' a hair care I.