Marien wart ein bot gesant von himelrîche in kurzer
stunt, Her Gabriel was er genannt, er grözte si ûs
reinem munt: „Ave Maria künegin, von got sol tu
gegrüzet sin!“ das war ein saeliclîcher vont.

Maria, diu erschrac sich ser, do si den Engel âne sach.
Der engel sprach: „vürht dir niht mer, got will komen
in din vach von himelrîche in kurzer vrist, er will sich
nemmen Jesus Krist.“ Was wunders do an ir beschach.

Maria diu ret wider in: „lieber, sag mir vüro baz“
„Du solt gebern ein kindelîn,“ der engel sprach „âne
allen haz, der aller welt ein loeser ist, der kumt ze dir
in kurzer vrist, dar an will er niht wesen laz.“

Maria sprach: „wie mag ez sîn, daz magt ein kint geberen sol?“ 
„Ich sag dir uf die triuwe mîn, der heilig geist der kann ez wol: 
Er kann wol würken waz er will, keins wunders ist 
im nihte ze vil, wan er ist aller gnaden vol.“

E daz der Engel von ir schiet Maria diu ret wider in:
„Sîn götlîch warheit mir daz riet, daz ich in sînem
willen bin, Got wel, daz ich in âne sehe, nach sînem
willen mir beschehe, daz sint die besten vröude min.