Allez daz den summer her mit vroyden was
daz beginnet truren mit der winderlanghen sweren zit
sanghes sint de voghelin gheswigen uberal
gar verdorven sint de blomen unde gras
scowet waz des kalden rifen oben vph dem walde lit
ez ist wol von sculden ist de grvne heyde val
daz ist eyn ghemeine claghe
de mich vroyden wendet
daz ist an minem lesten taghe
leyder unvorendet

Se nimmt immer wunder waz de claghe si
de ich durch besserunge minen lieben vriunden han geseyt
daz wil ich bescheiden daz ir sprechet ez ist war
in der werlde niemen lebet sunden vri
ia ist ez so ie lenger so ie boser in der kristenheit
mine tage swindent unde kurtzent mine iar
sold ich da bi vroyden phlegen
de von herczen gienge
dienest lazzen under wegen
der mich baz vorvienge

Swenne ich sunderhafter in den rvwen pade
so wil si min vrowe daz ich ir kinden singhe niwen sang
so muz ich mich ir gewaltes mit verzeihen wern
si gedarf mich nimmer me an sich gheladen
vmb eyn scheyden van ir denst so stet alles min ghedanc
ich bin in den willen daz ich wil de sele irweren
de ich van gote irvernet han
mit uppichlichen sanghe