Beauté dont la douceur pourroit vaincre les Rois,
Renvoyez moy mon coeur qui languist en servage,
Ou si le mien vous plaist, baillez le vostre en gage:
Sans le vostre ou le mien vivre je ne pourrois.
Quand mort en vous servant sans mon coeur je serois,
Ce me seroit honneur, à vous seroit dommage,
Dommage en me perdant, à moy trop d'avantage.
J'en jure par vos yeux, quand pour vous je mourrois,
Pourveu que mon trespas vous plaise en quelque chose,
Il me plaist de mourir, mon trespas poursuyvant,
Sans emporter mon coeur, dont le vostre dispose:
Et veux que sur ma lame Amour aille escrivant,
CELUY QUI GIST ICY, SANS COEUR ESTOIT VIVANT,
ET TRESPASSA SANS COEUR, ET SANS COEUR IL REPOSE.