Come gie's a sang, Montgomery cry'd,
And lay your disputes all aside,
What nonsense is't for folks to chide
For what's been done before them:
Let Whig and Tory all agree,
Whig and Tory, Whig and Tory,
Whig and Tory all agree,
To drop their Whig-meg-morum;
Let Whig and Tory all agree
To spend this night wi' mirth and glee,
And cheerfu' sing alang wi' me
The Reel o' Tullochgorum.

What needs there be sae great a fraise
Wi' dringing dull Italian lays,
I wadna gie our ain Strathpeys
For half a hunder score o' them;
They're dowf and dowie at the best,
Dowf and dowie, dowf and dowie,
Dowf and dowie at the best,
Wi' a' their variorum;
They're dowf and dowie at the best,
Their allegros and a' the rest,
They canna' please a Scottish taste
Compar'd wi' Tullochgorum.

But for the base unfeeing fool,
That loves to be oppression's tool,
May envy gnaw his rotten soul,
And discontent devour him;
May dool and sorrow be his chance,
Dool and sorrow, dool and sorrow,
Dool and sorrow be his chance,
And nane say, wae's me for him!
May dool and sorrow be his chance,
Wi' a' the ills that come frae France,
Wha e'er he be that winna dance
The Reel o' Tullochgorum.