Estre indigent et donner tout le sien,
Se feindre un ris, avoir le cœur en pleinte,
Haïr le vray, aimer la chose feinte,
Posseder tout et ne jouir de rien :
 
Estre délivré et trainer son lien,
Estre vaillant et couarder de crainte,
Vouloir mourir et vivre par contrainte,
Et sans profit despendre tout son bien:
 
Avoir tousjours pour un servil hommage
La honte au front, en la main le dommage :
A ses pensers d’un courage hautain
 
Ourdir sans cesse une nouvelle trame,
Sont les effets qui logent en mon ame
L’espoir douteux et le tourment certain.