Helas mon Dieu y a il en ce monde
  mal ou ennui dont on ait cognoissance
  Qui soit esgal à ma douleur profonde
Helas mon Dieu si j’avois la puissance
  De declarer la peine que je porte
  Ce me seroit une grande allegeance.

Helas mon Dieu pitié estes vous morte ?
  Qui vous defend que mort ne me contente
  Puis qu’autre espoir je n’ay que me confort ?
Helas mon Dieu le temps de mon attente
  S’en va passant comme songe ou fumee
  Et ma douleur est seule permanente.

Helas mon Dieu amie trop aimee
  Voyez vous point à mon dueil inportable
  Vostre grand tort et foy peu estimee ?
Helas mon Dieu amitié perdurable
  D’ingrat oubly est mal recompensee
  J’en ay la peine et l’autre en est coulpable

Helas mon Dieu qui sçavez ma pensee
  Soyez content que je m'estrange
  Mettant à fin l’euvre mal commencee
Helas mon Dieu si mon Coeur ne la change
  Faites au moins que mon œil mieux se garde
  De la chercher et que plus ne s’y renge.

Helas mon Dieu si ma mort tant lui tarde
  Ordonnez luy qu’apres ma sepulture
  Tard repentie elle entende et regarde
Que plus ma foy que sa cruauté dure.