Pleurez avec moy, tendres fleurs,
  Aportez, ormeaux, les rosees
  De vos mignardes espousees,
  Meslez vos pleurs avec les pleurs
  De moy désolé qui ne puis
Pleurer autant que j’ay d’ennuis !
  Pleurez aussi, aube du jour :
  Belle Aurore, je vous convie
  A mesler une doulce pluye
  Parmi les pleurs de mon amour,
  D’un amour pour qui je ne puis
  Trouver tant de pleurs que d’ennuis !
Cignes mourans, à ceste foys
  Quittez la Touvre Engoumoisine
  Et meslez la plainte divine
  Et l’aer de vos divines voys,
  Avec moy chetif qui ne puis
  Pleurer autant que j’ay d’ennuis !
Oiseaux qui languissez marris,
  Et vous, tourterelles fachees,
  Ne comptez aux branches sechees
  Le veuvage de vos maris
  Et pleurez pour moy qui ne puis
  Pleurer autant que j’ay d’ennuis !
Pleurez, o rochers, mes douleurs
  De vos argentines fonteines
  Pour moy qui souffre plus de peines
  Que je ne puis trouver de pleurs,
  Pour moy douloureux qui ne puis
  Plorer aultant que j’ay d’ennuis !