Dame, einsi est qui m’en covient aler
Et departir de la douce contree
Ou tant ai maus sosferz et endurez.
Quant je vos lais, droiz est que je m’en hee
Deus ! por quoi fu la terre d’Outremer
Qui tant amanz aurai fait dessevrer
Dont puis ne fu l’amors reconfortee
Ne ne porent la joie remembrer.

Ja sanz amors ne porroie durer
Tant par un truis fermement ma pensee
Ne mes fins cuers ne m’en lait retorner.
Ainz sui a lui la ou il velt et bee.
Trop ai apris durement a amer,
Por ce n’en voi conment puisse durer
De joie avoir de la plus desirree
C’onques nus hom osast merci crier.

Je ne voi pas quant de li sui partiz
Que puisse avoir bien ne solas ne joie,
Car onques rien ne fis si a enuis
Com vos laissier se je jamés vos voie.
Trop par en sui dolens et esbahiz
Par mainte foiz m’en serai repentiz,
Quant j’onques voil aler en ceste voie
Et je recort vos debonaires dis.

Biaus sire Deus, vers vos me sui gauchiz
Tot laiz por vos ce que je tant amoie.
Li guerredons en doit estre floris
Quant por vos per et mon cuer et ma joie.
De vos servir sui toz prez et garnis
A vos me ren, biau pere Jhesus Cris !
Si bon seignor avoir je ne porroie :
Cil qui vos sert ne puet estre traïz.

Bien doit mes cuers estre liez et dolenz :
Dolens de ce que je part de ma dame,
Et liez de ce que je sui desirrans
De servir Dieu cui est mes cors et m’ame.
Iceste amors est trop fine et puissanz
Par la covient venir les plus sachanz.
C’est li rubinz, l’esmeraude, la dame
Qui tost garist des vieus pechiez puans.

Dame des cieus, grant reïne puissant
Au grant besoing me soiez secoranz !
De vos amer puisse avoir droite flamme ;
Quant dame pert, dame me soit aidanz.