O doulce Main, Main belle. Main pollie,
Main qui les cueurs fait lier et deslie,
Main qui le mien a prins sans y toucher,
Main qui embrasse, et semond d'approcher,
Main qui à moy doibt ouvrir, ô Main forte,
Qui fors à moy, à tous ferme la porte.
Main qui souvent en estraignant le doigt
Sans dire mot m'a dict je sçay bien quoy.
Main qui la trousse et fleische, sans doubler,
A Cupido seule pourrois oster :
Dy je la main que Cupido feroit
Mouvoir d'amour quand il la toucheroit.
Main qui peult seule et le soir et matin
Laisser la mienne approcher du tétin.
Main qui permet s'il est besoing qu'on puisse
En se jouant sçavoir quelle est la cuisse :
Main qui permet par foys oultre passer,
Mais ce seroit assez pour trespasser.
Main qui peult bien faire encore autre chose,
Qui plaist autant, mais que dire je n'ose.
Main à qui seulle appartient qu'elle sçache
Ce qu'on ne voit, ce qu'on cerche, et qu'on cache
Main qui peult mieulx par escript asseurer
Que l'œil par veoir, et bouche pour jurer.