Trois rondeaux

Bon jour, et puis, quelles nouvelles?
N'en sçauroit-on de vous avoir ?
S'en bref ne m'en faites sçavoir,
J'en ferai de toutes nouvelles.
  Puis que vous estes si rebelles,
  Bon vespre, bonn nuict, bon soir,
     Bon jour.

Mais si vous cueillez des groyselles,
Envoyez m'en: car pour tout veoir,
Je suis gros: mais c'est de vous veoir
Quelque matin mes Damoiselles:
     Bon jour.

Gris, Tanné, Noir, porte la fleur des fleurs
Pour sa livrée, avec regrets et pleurs,
Pleurs et regrets en son cueur elle enferme:
Mais les couleurs dont ses vestements ferme,
Sans dire un mot exposent ses douleurs.
  Car le Noir dict la fermeté des cueurs:
Gris le travail: et Tanné les langueurs:
Par ainsi c'est langueur en travail ferme,
      Gris, Tanné, Noir.
  J'ay ce fort mal par elle, et ses valeurs,
Et en souffrant, ne crains aucuns malheurs,
Car sa bonté de mieux avoir en ferme:
Ce nonobstant, en attendant le terme,
Me faut porter ces trois tristes couleurs
      Gris, Tanné, Noir.

Oyez le guay, petit mignon,
Monsieur, Madame Pimpelotte,
Avec le clerc à la pelotte,
Non faict, si faict, par Santrignon.
Villain, vous trenchez de l'oignon,
Et ne valez pas eschalotte:
  Oyez le guay, etc. 

Gros coquin, oste le tignon,
Si tu veux avoir la bachelotte ;
Drinc, drinct a mis en eschec l'hoste.
M'amye, levez le groignon,
  Oyez le guay, etc.