Summermaie : fünf leichte Lieder in Aargauer Mundart nach Gedichten von Dora Haller für eine Singstimme mit Klavierbegleitung

Chumm Büebli, chumm i grüene Wald!
 [ ... ]

Wie isch es schön, wenn d’Sunne schynt
und d’Chinde ringelreihe,
wenn’s Imbi usem Hüüsli flügt
a jede Bluememaie.

Wenns gar nid weiß, wos ane wott,
will alli Blüemli lache
mit ihrne Cheidli gäl und rot,
und ’s gar so glustig mache.

Es schneielet scho vom Chriesibaum.
Meiteli, gump i Maie!
’s isch numen einischt gar so schön,
drum muesch di jetzig freue!

Tanz und wirble-n-eis zringesrum!
Loh dyni Füeß lo springe!
’s chönnt eim jo schier der Ote näh,
alls wott blüeien und singe!

Lauf und lauf i der Matte noh!
Weisch schier nid, wo d’ wottsch günne!
Tuusig Liechtli hets uf de Weid,
und alli di Liechtli brünne!

De Summerwind wait übers Fäld,
und bruuni Gräser blüeie.
Margrite stöhnd wie Sunne do,
’s göhnd ganzi Chränz de Borde noh
Chleeblüemli föhnd a glüeie.

Chleeblüemli, still und rot wie Füür,
am Wägrand, a de Raie
Wenn’s Möntschehärz im Blüeie stoht,
so isch es au so warm und rot
wie früschi Summermaie.

Chumm sing mer es Liedli!
’s isch bald wieder Nacht.
De Mond chunnt go luege,
was ’s Ärdeland macht.

Chumm sing mer es Liedli!
De Mond ghört is gärn 
und rüeft syni G’spone,
e Wulke, e Stärn.

Und d’Baum tüend is lose,
und d’Bluemen am Hag,
und drüber verlüüchtet 
’s letscht Liechtli vom Tag.