Two Love Songs

Of a' the airts the wind can blaw, 
	I dearly like the west, 
For there the bonnie Lassie lives, 
  The Lassie I lo'e best: 
There's wild-woods grow, and rivers row, 
  And mony a hill between; 
But day and night my fancy's flight 
  Is ever wi' my Jean. 

I see her in the dewy flowers, 
  I see her sweet and fair; 
I hear her in the tunefu' birds, 
  I hear her charm the air: 
There's not a bonnie flower that springs 
  By fountain, shaw, or green; 
There's not a bonnie bird that sings, 
  But minds me o' my Jean.

O Mally's meek, Mally's sweet,
Mally's modest and discreet,
Mally's rare, Mally's fair,
Mally's ev'ry way compleat.

As I was walking up the street,
A barefit maid I chanc'd to meet,
But O, the road was very hard
For that fair maiden's tender feet.

It were mair meet, that those fine feet
Were weel laced up in silken shoon,
And twere more fit that she should sit
Within yon chariot gilt aboon,

Her yellow hair, beyond compare,
Comes trinkling down her swan white neck,
And her two eyes, like stars in skies,
Would keep a sinking ship frae wreck.

O Mally's meek, Mally's sweet,
Mally's modest and discreet,
Mally's rare, Mally's fair,
Mally's ev'ry way compleat.