Vier Lieder in Schweizer Mundart

I weiß mer schier nid z'helfe
vor luter Glück und Freud:
hüt het mer eusers Chindli
s'erst Mol de Name g'seit!

Wenn d'Engel tete singe,
es chönt nid schöner si,
as wenns vom chline Müli
s'erst Mol tönt: "Müetterli!"

De Schuelsack a Rügge,
En Öpfel i d'Hand,
Es früsch glettets Scheubeli,
En gsunde Verstand,
So reiset mis Chindli
Luschtig dervo,
Und loht mi eleigge
Wi wird's em ächt go?

Großmüetterli im Himmel,
wie han i di so gärn!
All Obig wenn's tuet dunkle
und fürchunt Stärn um Stärn,
denn suechi mir von allne
de schönst und heiterst us:
er stoht so lieb und fründli
grad über eusem Hus.
I luege, wiener lüchtet
uf siner höche Wacht;
denn rüefi lislig ufe:
"Großmüetterli, Guetnacht!"

Chemifäger isch im Hus,
das git mer jetzt es Wäse!
Er puzt is alle Öfen us
mit sim verstrupfte Bäse!

Im Chemi obe singt er eis
und pfift; de lustig Fäger,
und wenn er obenabe chunt,
so glänzt er wine Neger!

Jetzt goht er witer um es Hus,
schwingts Bäseli wine Flagge
doch eusi Chöchi, s'isch en Grus
het ganz en schwarze Bagge!