De moins que riens l’on peut à peu venir
Et puis ce peu n’a se si peu de puissance
Qu’assez ne fasse à assez parvenir
Celuy qui veut avoir la suffisance
Mais si au trop (de malheur) il s’avance
Ne recevant d’assez contentement
En dangeresse par la folle inconstance
De retourner à son commencement
      De moins que riens.

De plus qu’assez l’on peut à trop venir
Et puis ce trop a si grande puissance
Que bien tost fait un rien parvenir
Celluy qui n’a d’assez la suffisance
Mais si de peu (de bonheur) se contente
En detestant de trop l’avancement
Asseuré est par constance prudente
De retourner à son commencement
       De plus qu’assez.