Demandes-tu, douce ennemie,
Quelle est pour toy ma pauvre vie ?
Helas certainement elle est
Telle qu’ordonner te la plaist.
 
Pauvre, chetive, et langoureuse,
Dolente, triste, malheureuse,
Et tout le plus fascheux esmoy
D’amour fascheux loge chez moy.
 
Apres demandes-tu, ma mie,
Quels compagnie a ma vie ?
Certes accompagnée elle est
De tels compaignons qu’il te plaist.
 
Ennuy, travail, peine, tristesse,
Larmes, souspirs, sanglots, destresse,
Et tout le plus fascheux soucy
D’amour fascheux y loge aussy.

Voyla comment par toy, Marie,
Je traine ma chetive vie,
Heureux du mal que je reçoy
Pour t’aimer cent fois plus que moy.