Quand je suis tout baissé sur vostre belle face,
Je voy dedans vos yeux je ne sçay quoy de blame,
Je ne sçay quoy de noir, qui m’esmeut tout le sang,
Et qui jusques au cœur de veine en veine passe.
 
Je voy dedans Amour qui va changeant de place,
Ores bas, ores haut, tousjours me regardant,
Et son arc contre moy coup sur coup desbandant.
Las ! si je faux, Raison, que veux-tu que je face ?
 
Tant s’en faut que je sois alors maistre de moy
Que je vendrois mon père et trahirois mon roy,
Et ma sœur, mes frères et ma mère ;
 
Tant je suis hors du sens après que j’ay tasté
A longs traits amoureux de la poison amere,
Qui sort de ces beaux yeux dont je suis enchanté.