Le ciel ne pouvoit mieux nous monstrer son sçavoir
Qu’en vous formant Madame et si sage et si belle,
Et qu’en vous departant de grace naturelle
Autant qu’une Déesse en pourroit mesme avoir.

Mais si vous faisant telle au monde il a fait voir
En un subject mortel sa puissance immortelle,
Vous reserrant ainsi en prison si cruelle
Il a fait son envie esgalle à son pouvoir.

Las ! qu’est-ce que j’ay dit ? ce n’est pas par envie
Que vostre liberté le ciel vous a ravie.
Plustost pour nostre bien il vous cache à nos yeux

Car qui verroit de pres vostre celeste face
Feroit son paradis en ceste terre basse
Et ne voudroit jamais l’aller chercher aux cieux.