M' óenurán im aireclán 
cen duinén im gnáis: 
robad inmuin ailethrán 
ré n-dul i n-dáil m-báis.  

Bothnat deirrit diamair 
do dílgud cach cloín; 
cubus díriuch diamain 
dochum nime noíb.  

Nóebad cuirp co sobésaib: 
saltrad ferda for, 
súilib tláithib todéraib 
do dílgud mo thol.  

Tola fanna féodaidi, 
freitech domnáin ché, 
coicle bána béodaidi, 
ba sí dígde Dé. 

 ... 

Mothúara, mo thuinide, 
robad inmuin cacht; 
ním-dingénad cuilide 
mo longud, cen acht.  

Arán toimse tírmaide  --  
maith don'airnem gnúis  --  
uisce lerga lígmaise 
ba sí deog no lúis.  

 ... 

Críst mac Dé dom thaithigid, 
mo Dúilem, mo Rí, 
mo menma día aithigid  
issind falith i m-bí.   

 ... 

M' óenurán im aireclán, 
m' óenurán am-ne; 
m' óenur do-llod forsin m-bith; 
m' óenur rega de.  

M' óenur ma do-rogbus ní 
d' úabar betha cé, 
cluinte mo núallán oc caí, 
m' óenurán, a Dé.