A bonnie ‘No’, with smiling looks again,
  I wald ye learn’d, sen they so comely are.
As touching ‘Yes’, if ye suld speak so plain,
  I might reprove you to have said so far.
  Nocht that your grant, in ony ways, micht gar
Me loathe the fruit that courage ocht to choose;
  But I wald only have you seem to skar,
And let me tak it, feigning to refuse;

And warsle, as it were against your will,
  Appearing angry, though ye have no ire:
For have, ye hear, is halden half a fill.
  I speak not this as trowing for to tire;
  But as the forger, when he feeds his fire,
With sparks of water maks it burn more bauld;
  So, sweet denial doubles but desire,
And quickens courage fra becoming cauld.

Wald ye be made of, ye maun mak it nice;
  For dainties here are delicate and dear,
Bot plenty things are priz’d to little price.
  Then, though ye hearken, let no wit ye hear,
  But look away, and len them aye your ear:
For, follow love, they say, and it will flee.
  Wald ye be lov’d, this lesson maun ye leir;
Flee whilom love, and it will follow thee.