J'espere et crain, je me tais et supplye.
Or’ je suis glace et ores un feu chaut.
J'admire tout et de rien ne me chaut.
Je me delace et soudain me relie.

Rien ne me plaist, sinon ce qui m'ennuie :
Je suis vaillant et le coeur me defaut.
J'ay l'espoir bas, j'ay le courage haut,
Je doute Amour, et si je le deffie.

Plus je me pique, et plus je suis retif.
J'ayme estre libre et veux estre captif.
Cent fois je meurs, cent fois je pren naissance.

Un Promethée en passions je suis.
Et pour aymer perdant toute puissance
Ne pouvant rien je fay ce que je puis..