Ne je ne dors ne je ne veille,
Tant ay fort la puce en l'oreille,
C'est du mains que de souspirer;
Car contraint suis de desirer
Que Mort contre moy se resveille.

Desir ne veult que je sommeille,
L'oeil couvert ennuy me conseille
Que je transisse de pleurer.
  Ne je ne dors [ne je ne veille,
  Tant ay fort la puce en l'oreille,
  C'est du mains que de souspirer.]

Je n'ay pas la coulleur vermeille,
C'est par vous, dont je m'esmerveille,
Comment vous povez endurer
Que pour vous craindre et honnourer
Je souffre doulleur nonpareille.

  Ne je ne dors [ne je ne veille,
  Tant ay fort la puce en l'oreille,
  C'est du mains que de souspirer;
  Car contraint suis de desirer
  Que Mort contre moy se resveille.]