Assignés chi, Griviler, jugement :
Ou quel puet miex chieus se paine emploier
Qui Amours veut par parole essauchier,
Ou en chelui qui aime loiaument
Pour che qu'il n'ait volenté ne talent
                De soi cangier,
Ou en celui qui aime faussement
                Pour ravoier ?

— Adan, de che vous jugerai briement.
En un loial a peu a preechier,
Et ensement, qui est en bon sentier,
Peu fait qui dist : « Alés seürement » .
Chieus fait trop miex qui se paine despent
                Au losengier,
Tant qu'il l'ait fait a amer loiaument
                Acoragier.

— Jehan de Griviler, seur fondement
Foivle et mauvais fait mal edefier .
Laissiés le faus amant a justichier,
Si vous tenés a chelui qui ne ment,
C'on voit par defaute d'ensengnement
                Maint desvoier
Et mainte tour qui n'a retenement
                Adamagier.

— Adan, sachiés que mal ot qui n'entent,
Et mal entent c'on ne puet conseillier.
Chiex fait trop mains qui loe un bon ouvrier
Que ne fait chieus qui a ouvrer l'aprent ;
Qui chou ne set ne voit pas clerement,
                Pour droit jugier,
N'il n'est pas plains de bon entendement,
                Au mien cuidier.

— Jehan, chelui resanlés proprement
Qui le grant fais prent, si laist le legier.
Li hon qui veut le grant fais encarchier
Le pieur prent en son manïement,
Et si dist on par tout communement
                Que de bruhier
Ne porroit nus, tant ouvrast soutieument,
                Faire esprevier.

— Adan, sera chis estris longement ?
Mout savés bien de vostre tort plaidier.
Hom soëlés n'a mestier de mengier.
Laissiés chelui qui aime fermement,
Si conseilliés de son fol errement
                Le malparlier.
On doit vitaille a familleuse gent
                Appareillier.

— Jehan, se vous ne posés autrement,
Che c'avés dit vous couvient renoier.
On doit anchois l'estavle verillier
Que li chevaus soit perdus nichement ;
Pour che couvient avoir garnissement ;
                Mais qui trechier
Veut, il ne fait de bon preechement
                El que moquier.

— Adan, tout faus sont li vostre argument.
On puet mout bien pecheour radrechier,
Quant on le veut estruire et ensengnier,
Et faire encor ovrer plus saintement
Que ne fait chieus qui vit onniement
                Sans folier.
Preus est qui fait povre commenchement
                Monteplier.