Sumer ouget sine wunne,
daz ist an der zit:
prüeve er wol swer tihten kunne
waz materie lit
an dem walde und uf der heide breit.
wan mac schouwen
wie die ouwen
stant bekleit,
waz der anger lichter bluomen treit.
est ein altgesprochen wort:
swa din herze wont, da lit din hort.
 
Ich hab endelichen funden
einen schoenen hort.
den kos ich mir zeinen stunden:
nust min herze dort
bi dem horde der mir füeget pin.
dú vil reine
wandeis eine
muos mir sin
hort in dem vil senden herzen min.
est ein altgesprochen wort:
swa din herze wont, da lit din hort.
 
Min hort kan wol tugende horden
unde hohen muot.
dú mir ist ze horde worden,
dest min frouwe guot,
in der güete,loese, wol gestalt.
ir gebaren
an den jaren
mich tuot alt,
swie ir tugende doch sin manicvalt.
est ein altgesprochen wort:
swa din herze wont, da lit din hort.
 
Maniger der hat hort verborgen
des er troestet sich:
min hort git mir niht wan sorgen
unde smähet mich.
min vil lieber hort ist mir also
gar unnütze, 
minne schütze
Cupido
traf min herze, sit bin ich unfro.
est ein altgesprochen wort:
swa din herze wont, da lit din hort.
 
Minne dú ist gewalteclichen
allen dingen obe.
ir kan niht uf erde entwichen
es gevahe ir klobe.
wisheit, hort diu beide nigent ir.
minne süesse,
kumber büesse
nach der gir,
twinge minen hort geliche mir.
est ein altgesprochen wort:
swa din herze wont, da lit din hört.