Se je souspir parfondement
Et tendrement
Pleure en recoy,
C'est, par ma foy,
Pour vous, quant vo faitis corps gent,
Dame, ne voy.

Vostre dous maintieng simple et coy,
Vo bel aroy,
Cointe et plaisant,
Vo maniere sans effroy,
Pris m'ont cil troy
Si doucement
Qu'à vous tres amoureusement
Entierement
Doing et ottroy
Le cuer de moy
Qui loing de vous esbatement
N'a n'esbanoy

  Se je souspir parfondement
  Et tendrement
  Pleure en recoy,
  C'est, par ma foy,
  Pour vous, quant vo faitis corps gent,
  Dame, ne voy.

Si que je port plus grief anoy
Qu'onques mais n'oy,
Secretement;
Mais, par m'ame, je le conjoy
Et le reçoy
Tres humblement,
Qu'aligier poués mon tourment
Legierement,
D'un seul ottroy,
Et plus qu'un roy
Moy faire vivre liement;
Ainsi le croy.

  Se je souspir parfondement.

Dame, mis m'avés en tel ploy,
Bien le perçoy,
Que, vraiement,
En vous sens, temps et vie employ
Et toudis croy
En ce talent.
Et se loing sui d'aligement
Et povrement
De mercy j'oy,
Ne m'en desvoy,
Car si grant honnour nullement
Avoir ne doy.

  Se je souspir parfondement
  Et tendrement
  Pleure en recoy,
  C'est, par ma foy,
  Pour vous, quant vo faitis corps gent,
  Dame, ne voy.