Motetus
 Trop plus est bele que biauté
 Et millour que ne soit bonté,
 Pleinne de tout ce, à dire voir,
 Que bonne et belle doit avoir,
 Ce m'est vis, celle que desir
 Et aim sans nul vilain desir.
 Dont se je l'aim, et je qu'en puis,
 Quant en sa fine biauté truis
 De tous mes maus la garison,
 Leesse, confort, guerredon
 Et secours de tous les meschiés
 Dont par desir sui entichiés,
 Comment qu'elle n'en sache rien;
 Car toute la joie et le bien,
 Que j'ay, de sa grace me vient,
 Sans plus, quant de li me souvient;
 N'autre bonté de li n'enport.
 Si pri Amours qu'en tel acort
 Soit, pour ce que miex l'aim que mi,
 Qu'elle me teingne pour ami.
 Amen.

Triplum
 Biauté parée de valour,
 Desirs qui onques n'a sejour
 D'acroistre, eins croist de jour en jour
 En plaisance et en douce ardour,
 Dous regars pris par grant savour,
 Tous pleins de promesse d'amour,
 D'espoir, de joie, de tenrour
 Et de pointure de douçour,
 Font que j'aim des dames la flour.
 Or me doint Diex grace et vigour
 Qu'au gré d'Amours et à s'onnour
 La puisse servir sans folour.
 Amen.

Tenor
 Je ne sui mie certeins d'avoir amie,
 Mais je suis loyaus amis.