Je sens portraits dedans ma souvenance
Tes longs cheveux, et ta bouche, et tes yeux,
Ton doux regard, ton parler gracieux,
Ton doux maintien, ta douce contenance.

Un seul Janet, honneur de nostre France,
De ses crayons ne les portrairoit mieux,
Que de l’Archer le trait ingenieux 
M’a peint au cœur leur vive remembrance.

Dans le cœur donque, au fond d’un diamant,
J’ay ton portrait, que je suis plus aimant
Que mon cœur mesme. O vive portraiture !

De ce Janet l’artifice mourra ;
Dedans mon cœur le tien me demourra,
Pour estre vif après ma sepulture.