Franc de raison, esclave de fureur,
Je vay chassant une Fere sauvage,
Or' sur un mont, or' le long d'un rivage,
Or' dans le bois de jeunesse et d'erreur.

J'ay pour ma lesse un long trait de malheur,
J'ay pour limier un violent courage,
J'ay pour mes chiens l'ardeur et le jeune âge,
Et pour piqueurs l'espoir et la douleur.

Mais eux voyans, que plus elle est chassee,
Plus elle fuit d'une course eslancee,
Quittent leur proye: et retournent vers moy

De ma chair propre osant bien leur repaistre.
C'est grand pitié (à mon dam je le voy)
Quand les valets commandent à leur maistre.