Le Soleil et nostre Roy
Sont semblables de puissance,
L’un gouverne dessous soy
Le Ciel et l’autre la France.

L’un du Ciel tient le millieu,
Des astres clarté premiere,
Et l’autre comme un grand Dieu
Aux terres donne lumiere.

L’un n’est jamais offensé
D’orages ny de tempeste,
L’obscur est tousjours persé
Des beaux rayons de sa teste.

L’autre a tousjours combatu
Les Guerres et les Envies
Et fait sentir sa vertu
Aux puissances ennemies.

L’un est aucteur de la Paix
Chassant le discord du Monde
Illustrant de ses beaux rais
La terre le Ciel et l’Onde.

Et l’autre ayant du Discord
La puissance rencontrée,
A mis les guerres à mort
Et la Paix en sa contrée.

Tout Astre prend du Soleil
Sa lumiere tant soit haute,
Car c’est l’Astre nompareil
Liberal sans avoir faute :

Du Roy vient force et vigueur
Honneur et Grandeur royalle,
Et tout homme de bon cœur
Connoist sa main Liberale.

Le Soleil est couronné
De feux qu’il pousse ou retarde,
Et tout Astre bien tourné
Pour son Guide le regarde

De notre Roy la bonté
Mille grand Seigneurs assemble
Qui jettent plus de clarté
Que les Estoilles ensemble.

Brief le Soleil esclairant
Par tout, qui point ne repose,
De Charles n’est different
Seulement que d’une chose :

C’est que le Soleil mourra
Apres quelque temps d’espace,
Et Charles au Ciel ira
Du Soleil prendre la place.