Rädli, Rädli gumpp und tanz!
's ist vorusse heiterglanz;
d' Buobe chönd gah braige.

Öb's nu ghörig nachtid hüt,
hangid s'scho am Pfeisterbritt,
wien äs Ghüti Flaige.

Hangid s'a dr Stägebrugg
wien ä Jmd im Hochsigflug.
Wäris gäre dinne.

Ätti wott s'nid inela,
müöß zerst sibe Hämmli ha;
söll nu weidli spinne.

Rädli, Rädli gumpp und tanz!
Dusse stoht dr Karlifranz
mit em Schwäbelpfyffli.

Chan all Gaierler und Tänz,
ist au sust voll Sprüng und Pflänz
wien äs Wäberschiffli.

Eä, wär er au my Ma!
Plangelauf ufs Hochsigha.
Är ist gar frÿgfräite.

Wän's a ihm nu nid vertleidt!
Sait, äs gang än Ebigkeit;
mög mi nid erbeite.

Rädli, Rädli gumpp und tanz!
's ist vorusse heiterglanz.
D'Buobe sind ums Mürli.

Wäni sibe Hämmli ha,
müönd allsäme Rigel la
bis is Guggegürli.