Does haughty Gaul invasion threat,
  Then let the louns bewaure, Sir,
There 's Wooden Walls upon our seas,
  And Volunteers on shore, Sir:
The Nith shall run to Corsincon,
  And Criffell sink in Solway,
E'er we permit a Foreign Foe
  On British ground to rally.

O, let us not, like snarling tykes,
  In wrangling be divided,
Till slap! come in an unco loun,
  And wi' a rung decide it!
Be Britain still to Britain true,
  Amang oursels united;
For never but by British hands
  Must British wrongs be righted.

The kettle o' the Kirk and State,
  Perhaps a clout may fail in 't;
But deil a foreign tinkler-loun
  Shall ever ca' a nail in 't:
Our Fathers' Blude the kettle bought,
  And wha wad dare to spoil it,
By Heavens, the sacreligious dog
  Shall fuel be to boil it!

The wretch that would a Tyrant own,
  And the wretch, his true-sworn brother,
Who'd set the Mob above the Throne,
  May they be damn'd together!
Who will not sing, God Save The King,
  Shall hang as high 's the steeple;
But while we sing, God Save The King,
  We'll ne'er forget The People!
Fal de ral...