Kånn mih går nit beklåg'n,
bin nit krånk, kånn's nit såg'n,
håb' a Kuh und a Pferd,
håb' a Haus und an Herd,
håb' a Weib und a Kind,
nimmt mir's keiner so g'schwind.

Wånn mir's Pferd tät' krebier'n,
wånn ih d'Kuh tät' verlier'n,
tät' mir wåhrlih recht weh,
ging mir just so wie eh'.
Ohne Pferd, ohne Kuh
hätt' ih dessentweg'n g'nuh.

Wånn a Feuer auskam'
und mei Häuserl mir nahm'
würd' mir an recht'n Stoß geb'n,
tät's hålt doh überleb'n;
håt ma 'n lustigen Mut,
schlåft ma überåll gut.

Müsst' ih krånk lieg'n im Bett
und könnt' årbeit'n nöt,
wånn ih's übel a nahm',
denk' ih, Gott sucht dih ham.
Tät' mei Lies'l mih pfleg'n,
schnåpp ih auf, - nun, mein'tweg'n.

Wånn der Tod åber kam'
und mein Weiberl mir nahm'
und mein Kind'l dazu,
hätt' ih nimmermehr Ruh,
wär' mir d'gånze Welt leer,
bis ih ah droben wär'.