Craindre vous vueil, doulce dame de pris,
Amer, doubter, louer en fais, en dis,
Tout mon vivant, en quelque lieu que soye,
Et vous donne, m'amour, ma seule joye,
Le cuer de moy tant que je seray vis.

Jamais ne suy annuieux ne pensis
Ne douleureux, quant je voy vo clair vis
Et vo maintieng en alant par la voie.
  Craindre [vous vueil, doulce dame de pris,
  Amer, doubter, louer en fais, en dis,
  Tout mon vivant, en quelque lieu que soye.]

De vous amer cel m'est un paradis,
Vëu les biens qui sont en vous compris;
Faire le doy quoy qu'avenir en doye.
A vous me rens, lyes mieux que de soye,
Joieusement, et bon espoir toudis.

  Craindre [vous vueil, doulce dame de pris,
  Amer, doubter, louer en fais, en dis,
  Tout mon vivant, en quelque lieu que soye,
  Et vous donne, m'amour, ma seule joye,
  Le cuer de moy tant que je seray vis.]