Freut euch, wolgemuten kindt!
uns will des sussen mayen windt
ergeczen der laid,
die der laidig winter kalt uns hewer hatt gethan.
ir freut euch gein der lieben zeitt.
es grúnet schon widerstreitt
der walt und die haide.
dick lieb nach laid kumpt, da gedencket an.
ungemúte machet alt,
hoher mút kan iungen.
des bin ich an ganczen freuden worden baldt. 
des hat mich ir lieb mit irer gút beczwungen.

Wem nu von lieb lieb geschicht
und dem die lieb das gicht,
wem lieb gefellet,
dem thut lieb liebes kundt. lieb macht lieben lieb.
lieb die macht wol gestalt,
lieb die wirt in lieb bald.
lieb gesellet:
lieben vater liebs kindt, dem man ein liebs weib,
lieben bruder swester lieb
stellen kan die lieb.
was ist lieb lieber dann der mynne dieb?
lieb das wurt in lieb durch lieb zu dieb.

Was ich blumen ye gesahe,
was ich rosen ye geprach
den summer und den mayen,
die sind ungeleich gefar den rosen, die trug
ir schón, die sie mir
zu einem krenczlein gab von mir.
die hett sie gehayen,
das ich nye bekannt mer rosen also klug.
rosen auß irm belgelein
den wollen nicht entlachen,
der ward mir ein krenczelein auff das haupt mein.
das hett mir die lieb, die gut versprochen.