Mihi est propositum 
in taberna mori;
Vinum sit appositum 
morientis ori;
ut dicant, cum venerint 
Angelorum chori:
"Deus sit propitius
huic potatori!"
 
Poculis accenditur
Animi lucerna,
Cor imbutum nectare
volat ad superna. ?
mihi sapit dulcius
Vinum in taberna,
quam, quod aqua miscuit
Præsulis pincerna.

Tales versus facio,
quale vinum bibo;
Nihil possum scribere
nisi sumto cibo.
Nihil valet penitus,
quod jejunus scribo:
Nasonem post calices
Carmine præibo.
 
Suum culque proprium
dat natura munus:
Ego nunquam potui
scribere jejunus.
Me jejunum vincere
potest puer unus.
Sitim ac jejunum
odi tanquam iunus.
 
Nunquam mihi spiritus
Prophetiæ datur,
nisi quando fuerit
Venter bene satur.
Cum in arce cerebri
Bacchus dominatur.
Phoebus in me irruit
ac Miranda fatur.