Coetus noster laetus esto
pro Henrici sacro festo
est laetandi causa praesto
praesulis celebritas.

Quem elegit, quem dilexit,
quem ornavit, quem provexit,
in sublime quem erexit
divina benignitas.

Ortus in Britannia,
pollens Dei gratia,
superna providentia
pontifex efficitur.

Clarus in Upsalia,
demum pro iustitia
decertans in Finlandia
pugil Christi moritur.

Miris signis et variis
sanctum suum prodigiis
declarat venerabilem
Deus verus, quem coluit,
amavit atque docuit
colendum et amabilem.

Martyr Dei, iam laborum
et mercede tormentorum
summo bono sine metu
et Sanctorum fruens coetu
in aeterna gloria.

Te laudantem nostrum coetum
et in tua laude laetum
fac in coetu Angelorum
sempiterna beatorum
perfrui laetitia.
Amen.