Cent et cent fois penser un penser mesme,
A deux beaux yeux montrer à nud son coeur,
Boire tousjours d'une amere liqueur,
Manger tousjours d'une amertume extrème, 
 
Avoir la face et triste, et morne, et bleme,
Plus soupirer moins fléchir la rigueur,
Mourir d'ennuy receler sa langueur,
Du vueil d'autruy des loix faire à soy mesme ;
 
Un court despit, une aimantine foy
Aimer trop mieux son ennemy que soy,
Peindre en ses yeux mille vaines figures :

Vouloir parler et n'oser respirer,
Esperer tout et se desesperer,
Sont de ma mort les plus certains augures.