Swaalkes, leew' Swaalkes,
     Säggt, wat vertäll ji jo? --
Van'n Jungtje, 't was der de best in't Log,
Van'n Meisje, so nüwer un blau von Oog'.
He gung alleen, se satt alleen
Un sung hor söt Dööntjes hier up de Steen
     In Dunkeln under de Boom.

     Swaalkes, leew' Swaalkes,
     Säggt, wat vertäll ji jo? --
As dat Jungtje nu quamm un der lüsternd stund
Do kloppt hor Hartje, do sweeg hor Mund.
He kunn 't nich dragen, he muß hor sehn;
Nu satten se selig un still to tween
     In Dunkeln under de Boom.

     Swaalkes, leew' Swaalkes,
     Säggt, wat vertäll ji jo? --
Van'n Vader, de der sien Kind utschull,
Van'n Dochter, de hüm to Foten full,
Van'n Meisje, dat der vergung vor Leed,
Alleen hor bittere Tranen kreet
     In Dunkeln under de Boom.

     Swaalkes, leew' Swaalkes,
     Säggt, wat vertäll ji jo? --
Wi trucken vandan ower't wiede, wiede Meer,
Do quamm der en Schippje van't Noorden her.
"Leewe Swaalkes, jag nich so gau vorbi!
Saggt, sitt se woll noch un denkt and mi
     In Dunkeln under de Boom?"

     Swaalkes, leew' Swaalkes,
     Säggt, wat vertäll ji jo? --
Wi trucken wär um, da Schipp stürde Noord.
Sien beste Matrose full ower Boord.
"Leewe Swaalkes, dot et de Wind tovor
Un bringt mien letzte Godenacht to hor
     In Dunkeln under de Boom!"

     Swaalkes, leew' Swaalkes,
     Säggt, wat vertäll ji jo? --
Wi quammen wär an. Wat hät uns groo'd!
Wi finden 't jo all hier ut un dod!
Wi boon unse Hüsken nu anderswar;
Hier sücht et un klagt et so sünderwar
     In Dunkeln under de Boom.