Six Rondeaux

Le premier jour du mois de may 
De tanné et de vert perdu,
Las ! j'ay trouvé mon cueur vestu
Dieu scet en quel piteux array ! 

Tantost demandé je lui ay 
Dont estoit cest habit venu :
Le premier jour du mois de may
De tanné et de vert perdu.

Il m'a respondu : bien le sçay ;
Mais, par ma foy sera congneu.
Desplaisance m'en a pourveu ; 
Sa livrée je porteray 
Le premier jour du mois de may.

Gardez le trait de la fenestre,
Amans, qui par rues passez,
Car plus tost en serez blessez
Que de trait d'arc ou d'arbalestre.

N'alez à destre ne à senestre,
Regardant, mais les yeulx bessez ;
Gardez le trait de la fenestre,
Amans, qui par rues passez:

Se n'avez medicin bon maistre,
Si tost que vous serez navrez
A Dieu soiez recommandez,
Mort vous tiens, demandez le prestre ;
Gardez le trait de la fenestre.

Fuyes le trait de Doulx-regard,
Cueur qui ne vous savez deffendre ;
Veû qu estes desarmé et tendre :
Nul ne vous doit tenir coüard.

Vous serez pris, ou tost ou tard,
S'Amour le veult bien entreprandre.
Fuyes le trait de Doulx-regard,
Cueur qui ne vous savez deffendre.

Retraiez-vous soubz l'estendart
De Nonchaloir, sans plus attendre
Sa plaisance ; vous laissiez rendre, 
Vous estes mort : Dieu vous en gard ! 
Fuyes le trait de Doulx-regard.

Yver, vous n'estes qu'un villain. 
Esté est plaisant et gentil,
En tesmoing de May et d'Avril
Qui l'acompaignent soir et main.

Esté revest champs, bois et fleurs, 
De sa livrée de verdure 
Et de maintes autres couleurs,
Par l'ordonnance de Nature.

Mais vous, Yver, trop estes plain
De neige, vent, pluye et grezil ; 
On vous deust bannir en exil.
Sans point flater, je parle plain,
Yver, vous n'estes qu'un villain.

C'est fait, il n'en fault plus parler,
Mon cueur s'est de moy desparty;
Pour tenir l'amoureux party :
Il m'a voulu abandonner.

Riens ne vault m'en desconforter,
Ne d'estre doulent ou marry,
C'est fait il n'en fault plus parler :
Mon cueur s'est de moy desparty.

De moy ne se fait que mocquer,
Quant piteusement je luy dy
Que je ne puis vivre sans luy ;
A peine me veult escouter ; 
C'est fait il n'en fault plus parler.

Puis çà, puis là 
Et sus et jus,
De plus en plus
Tout vient et va.

Tous on verra,
Grans et menus :
Puis çà, puis là
Et sus et jus.

Vieulx temps desjà 
S'en sont courrus,
Et neufz venus,
Que dea, que dea,
Puis çà, puis là.