Deux sonnets de Louise Labé

Lut, compagnon de ma calamité.
 De mes soupirs témoin irréprochable.
 De mes ennuis controlleur veritable.
 Tu as souuent auec moy lamenté :

Et tant le pleur piteus t'a molesté,
 Que commençant quelque son delectable,
 Tu le rendois tout soudein lamentable,
 Feignant le ton que plein auoit chanté.

Et si te veus efforcer au contraire.
 Tu te destens & si me contreins taire :
 Mais me voyant tendrement soupirer,

Donnant faueur à ma tant triste pleinte :
 En mes ennuis me plaire suis contreinte.
 Et d'un dous mal douce fin esperer.

Las ! que me sert, que si parfaitement
 Louas iadis & ma tresse dorée.
 Et de mes yeus la beauté comparee
 À deux Soleils, dont Amour finement

Tira les trets causez de ton tourment ?
 Ou estes vous, pleurs de peu de duree ?
 Et Mort par qui deuoit estre honorée
 Ta ferme amour & itéré serment ?

Donques c'estoit le but de ta malice
 De m'asseruir sous ombre de seruice ?
 Pardonne moy, Ami, à cette fois,

Estant outrée & de despit & d'ire :
 Mais ie m'assure, quelque part que tu sois,
 Qu'autant que moy tu soufres de martire.