2 Old Scotch Songs

An whar' hae ye been a' day, 
My boy Tammy?
I've been by burn an' flowery brae, 
Meadow green, an' mountain grey,
Courtin' o' this young thing
Just come frae her mammy.

An' whar' gat ye that young thing 
My boy, Tammy ?
I gat her down in yonder howe, 
Smiling on a broomy knowe: 
Herdin' ae wee lamb an' ewe
For her puir mammy.

What said ye to the bonnie bairn, 
My boy, Tammy?
I praised her een, sae lovely blue, 
Her dimpled cheek, an' cherry mou'; 
An' pree'd it aft,as ye may trow!
She said, she’d tell her mammy.

I held her to my beatin' heart, 
My young, my smiling lammie!
I hae a house, it cost me dear, 
I've walth o' plenishin' an' gear; 
Ye'se get it a', wer't ten times mair. 
Gin ye will leave your mammy.

The smile gaed off her bonnie face
I maunna leave my mammy;
She's gi'en me meat, she's gi'en me claes, 
She's been my comfort a' her days, 
My father's death brought mony waes!
I canna leave my mammy.

Well tak' her hame and make her fain, 
My ain kind hearted lammie;
We'll gie her meat, we'll gie her claes, 
We'll be her comfort a' her days, 
The wee thing gies her hand, an' says, 
There! gang an' ask my mammy!

Has she been to the kirk wi' thee.
My boy, Tammy?
She has been to the kirk wi' me, 
An the tear was in her e’e 
For O, she's but a young thing, 
Just come frae her mammy.

Wilt thou be my dearie?
When sorrow wrings thy gentle heart,
[O]1 wilt thou let me chear thee?
By the treasure of my soul —
That's the love I bear thee —
I swear and vow that only thou
Shall ever be my dearie !
Only thou, I swear and vow,
Shall ever be my dearie !

Lassie, say thou lo'es me,
Or if thou wilt na be my ain,
[Sayna]2 thou'lt refuse me !
If it winna, canna be,
Thou for thine may choose me,
Let me, lassie, quickly die,
Trusting that thou lo'es me !
Lassie, let me quickly die,
Trusting that thou lo'es me!